始終都係香港人，鍾意過兩次新年，開開心心咁數之餘，又開開心心咁逗利是，哈哈！
自從返左份新工之後，少天時間對住部腦，唯有到農曆新年先打返上年個年度大事回顧啦～
上年對於我黎講，真係過得好快呀！
可能因為公公走左，阿爸又走埋，身邊o既「人流」冷清左，唔係咁想留喺屋企，所以時間過得快左掛。
加上一年轉左三份工，人生體驗多左，適應時間多左，所以時間都過得快左啦～
感情方面都幾好，勝在夠平凡，大家支持對方幾舒服。
經過一啲小風波， 感情又穩定左，咁就可以全力面對自己o既理想喇。
最開心就係竟然我真係可以去到西藏喇！
雖然無我想像中感覺咁澎湃，但是身處喺大自然之下，感覺自己o既渺小都係好重要o既事黎！
面對住多變o既大自然，吸收天地靈氣（有無咁誇張呀？=P），真係完全叉足電呀！
上年o既課題，都離唔開人o既脆弱同渺小，潛能o既無限同內在o既追尋。
我要感謝已經走左o既爸爸同公公，教識我做人有時唔化唔得；
感謝小哥同媽媽今年為左屋企付出咁多時間咁心力；
感謝D咁體諒我同埋支持我；
感謝F連份工都辭埋一齊去西藏；
感謝所有喺我背後支持我向住目標走落去o既每一個人！
今年，我要繼續排除萬難咁一企行呀！
