工作上的幸運

無論係信念創造實相，定係你大腦分析後根據你過往曾選擇或你曾經著重的事物來決定你對甚麼產生注意都好，我想講既只係咁耐以黎，我喺工作方面都係幸運既一群。

所謂幸運，並唔係有咩權力或者搵咩大錢，而係一直都做緊啲可以發揮所長既工。
記得有人十年前同我講過，做咩工作都好，都要做到最專業，咁樣先可以令人記得你，爬上去都容易啲。
或者係我注意既嘢根本就唔係哩度啦，一直都無辨法將啲器材背得滾瓜爛熟，「專業」同我總係有啲距離。
細個其實唔算係個多嘢講既人，一直都無察覺自己表達方面比較擅長，畫畫又唔係攞A嗰堆，陰錯陽差讀完攝影就入行做咗記者，條路係順遂咁行。
好彩當時老頂畀咗個人訪欄目我負責，唔係可能完全平衡唔到啲咁技術型既分析文章。
係嗰陣先發現自己鍾意同人傾計，每次同人傾計，總有啲得著，將佢哋既嘢組織完寫返出黎，畀更多讀者睇到，好似幾有意義咁樣（你問我，會有幾多人真係會睇吖？我唔知咖）。

同樣地，做領隊嗰陣可以將自己識影相，加埋帶團技巧「周圍去」，都係有成功感同滿足感既工作黎既。
近哩年，開始跟科技教育嗰邊既採訪，更覺自己有哩方面既幸運，可接觸到唔同既人，將佢講既嘢組織完寫返出黎，其他人睇完又真係有意見或者回應嗰下，有啲出乎意料。
自問寫採訪稿仍然喺「小學雞」階段，講到尾，載體盛載既內容先係重點吧。

黎到哩到，我想講既係，同人溝通加埋分析表達相關既工作，就係一路發展落黎發現到可以發揮既嘢。
於是繼續喺哩方面發展緊，敬請期待。