誰對，誰錯？

數月前曾打算寫一篇關於身邊發生的事情，卻又生怕寫得不好，於是一直就停下來了。
今天終於下筆完成它了，亂寫隨寫，才是這Blog的風格吧。

～～。。。

有一天坐左大家樂吃下午茶（實在是小妹的午餐XD），後來遇上倆母女，她們就坐在我旁邊的座位上。
然後開始她們的對話，先是大概小四的女孩先說：「我都唔係想食哩個餐。」
「我排緊隊果陣你又唔諗好，到我排到收銀，問你哩個好無，你話好架。依家又話唔食，你係咪唔食呀？」
「你都無俾時間我諗，如果係爸爸，佢實知我鍾意食咩架……」
「我都無同你食過大家樂，次次同你落黎食野，你都係話食麥當勞，咁我又點會知你o係度想食咩呀，你唔講我又點知呀？哩個世界無理所當然架，你仲食唔食呀？」
「……」女孩仍然很嬲似的，在礸牛角尖。
那媽媽繼續吃她買回來的下午茶餐，然後又說：「你真係唔食啦嘛？你唔食就今晚十點等我返黎先整野比你食架喇！」
女孩望著媽媽手上的雞翼，然後緩緩地說道：「我想食雞翼……」
「咁我要食你嗌果啲野牙？你要負返個責任架，你唔食你啲野，就搵嬸嬸俾個盒你裝住佢，哩啲今晚食啦。你裝住佢，我再俾隻雞翼你啦。」

整段對話隨著我吃完午餐完畢，雖然她們的對話有點吵耳，但這個媽媽是我最近見過的媽媽中，最懂得教女的一個。